Loading...
لاگ ان

ستاروں سے آگے جہاں اور بھی ہیں

علامہ محمد اقبال ،ڈاکٹر


ستاروں سے آگے جہاں اور بھی ہیں
ابھی عشق کے امتحاں اور بھی ہیں

تہی زندگی سے نہیں یہ فضائیں
یہاں سیکڑوں کارواں اور بھی ہیں

قناعت نہ کر عالم ِ رنگ و بُو پر
چمن اور بھی،آشیاں اور بھی ہیں

اگر کھو گیا اک نشیمن تو کیا غم !
مقامات ِ آہ و فغاں اور بھی ہیں

تُو شاہیں ہے ، پرواز ہے کام تیرا
ترے سامنے آسماں اور بھی ہیں

اِسی روز و شب میں اُلجھ کر نہ رہ جا
کہ تیرے زماں و مکاں اور بھی ہیں

گئے دن کہ تنہا تھا میں انجمن میں
یہاں اب مرے رازداں اور بھی ہیں


تبصرہ

No Comments Posted
Log in to post comments.
Keyboard